La Storie
La Ete di Mieç e je il periodi storic che plui di chei altris e à caraterizât la storie di Voleson. Di chei timps, difats, a son il cjistiel, l’implant urbanistic, la glesie ma ancje il non dal paîs che al ven dal todesc antîc: WAL "alture, rialç" e WASO "prât", duncje "prât cun alturis, rialçaments"; similmentri ai nons di altris lûcs che a fasevin part dal teritori aministratîf dal cjistiel: par esempli RUPA, dal Sloven RUPA "buse, fuesse" o POSTONCIECO dal Sloven PUSTINCA diminutîf di PUSTINA "tiere no coltivade".
Cun dut achest lis origjinis di Voleson a van cirudis te ete romane, al limit setentrionâl de centuriazion dal agri di Concuardie, lunc la strade che passant i puints dal Medune e dal Tiliment a puartave al Noricum (Austrie). Une vore antîc al è il prin implant dal cjistiel dal cuâl a si à testemoneance par la prime volte intal 1206, dutcâs lis sôs carateristichis a rimandin a struturis difensivis e di vuaite de tarde antichitât.
Intal XII - XIII secul chest cjistiel al jere abitât di une nobile famee di feudataris, imparintade cui Sbroiavacca; cheste famee a aministrave par cont dai patriarchis di Aquilee un grant teritori plaçât su lis dôs rivis dal Tiliment che plui o mancul al corispuint al dì di vuê ai Comuns di Voleson, Darzin, San Martin dal Tiliment e Sedean.
Chese Aree dal pont di viste eclesiastic e rapresentave la part meridionâl de Plêf di “Cosa” (San Zorç da la Richinvelde) di dulà che la Parochie di Voleson (che a cjapave dentri di se lis capelis di San Martin dal Tiliment e di Darzin) e fò distacade par ordin dal Vescul di Concuardie, intal 1335, viodude l’impuartance che il paîs e la famee che a indi tigive la jurisdizion, a vevin cuistade.
Anzit, propit par vie de lôr impuartance, ai siôrs di Voleson a fò concedût il privileç, conservât fintremai ai dîs di vuê, di sielzi il predi par la lôr glesie (juspatronât). I siôrs di Voleson che intal XIV secul a vioderin la lôr glesie divignî plêf, a no jerin plui chei imparintâts cui Sbroiavacca, par vie che daspò des vueris feudalis de seconde metât dal dusinte e jere vignude fûr une gnove famee imparintade cui Spilimberc e clamade Valvason-Cucagna. Intant il paîs al jere cressût intal numar dai abitants e di impurtance, chest in gracie ancje al disvilupâsi fûr des murîs, di borcs dulà che e si concentrave la popolazion che lavorave i cjamps e che a davualzeve ativitâts artigjanâls. Similmentri a ce che al capitave in altris bandis dal Friûl, i rapuarts jenfri la comunitât e i siôrs dal Cjistiel a jerin regolâts di statûts fats di pueste e datâts 1369.
Cuant che intal 1419-1420, la regjon e fò concuistade di Vignesie, i dinastie dai Volesons a restarin al lôr puest ancje se a pierderin buine part dai lôr podês di un timp; cun dut achel a continuarin a tignî i possès de tiere, il control sociâl, l’aministrazion de justizie e la facoltât di intervignî intes vicendis de glesie in virtût dal dirit di juspatronât.
Oltri ae Parochie dal Santissim Cuarp di Crist, il cuâl titul al jere leât al miracul de Sacre Tavaie (1294 o 1394?) a esistevin in paîs altris glesis e un convent. La vite religjose a Voleson e fò une vore ative inte Ete di Mieç e ancje in Etât Moderne. Intal Domo, costruît inte seconde metât dal ‘400, al diseve messe une colegjade di predis che a vevin l’oblic di côr.
Inte antighe parochiâl dedicade a San Zuan evangjelist (o Batiste) e a la Madone, intal 1485 a si jerin insediâts i Servidôrs di Marie e par lôr al fò costruît di pueste un convent. La stesse glesie almancul de metât dal ‘300 e jere za considerade santuari, centri di devozion popolâr, chest pe presince di une icone de Vergjine che e latave il Frut. Za prime dal 1355 a prosperave une confraternite di laics intitulade a Marie, che e jere dedite a oparis religjosis e di caritât, esercitadis dentri di un ospedâl dulà che a cjatavin ripâr e assistence i puars de zone, viandants e pelegrins.
Dulinvie dai secui XVI e XVII, intal cjistiel, tal borc e intes campagnis, la vite a leve indenant cui mûts e lis consuetudinis medievâls, cun dut achel no cence cualchi moment di ribelion come par esempli, la rivolte dai contadins dal 1511, o pûr lis tensions nassudis par cirî di arzinâ l’empit des aghis de Medune e dal Tiliment, che tancj problemis e dams a causarin aes coltivazions, aes cjasis e ae viabilitât.
A chest piçul mont antîc, tirât dongje ai Volesons, a meterin fin la colade de Republiche di San Marc, e lis armadis napoleonichis che propit culì intal 1797 a lassarin il lôr ricuart in ocasion de vitoriose Batae dal Tiliment cuintri lis trupis austriachis. La jurisdizion feudâl e fò abolide e il paîs dreçât a capitul di un distret aministratîf, il Cjanton di Voleson, che però nol ve continuitât intal cors dal ‘800.
Par i agns a vignî, la storie di Voleson e je chê dal Friûl e dal 1866 chê de Italie.
Pier Carlo Begotti (da «Valvasone, Guida all'incontro»)