Comune di Valvasone

Lis primis notiziis storichis sul cjistiel di Voleson nus ricuardin che intal 1218 chest al jere tignût a vuardie di Ulvino e Bonfante, par cont dal Patriarcje di Aquilee. Chescj doi a jerin i rapresentants de prime famee di feudataris che intal 1268 e colà in disgrazie a cause de ribelion di Corrado di Voleson. Chest toc di Tiliment al jere masse impuartant par no jessi vuardiât, in cont di chest, il patriarcje al infeudà di cheste jurisdizion Walterpertoldo di Spilimberc, il principâl esponent di une potente famee fedêl ae cause dal patriarcât.
Intal 1273 Walterpertoldo al restaurà lis postazions e lis oparis a control dal impuartant vât dal Tiliment, dut a câs cence cambiâ il caratar militâr dal insediament. Muart Walterpertoldo e finide la prime gjernazie dai Spilimbercs, la lote pe sucession a puartà al confront jenfri dôs fameis furlanis, i Zuccolo e i Cucagna. Intal 1292 il Patriarcje Raimondo Della Torre al infeudà ai Cucagna il teritori volesonês, fasint tacâ cussì, cun Simone Cucagna la seconde linie gjenealogjiche de famee dai siôrs di Voleson.
Inta chei timps Voleson al si identificave cu la struture militâr che e jere ancje la abitazion di chei nobii, ma di lì a pôc, atôr dal cjistiel a si disvilupà il borc, embrion de citât che nô o cognossin al dì di vuê. Prime dal 1300 i nobii a deciderin di costuî une cengledi mûrs, proviodint cussì ae prime deviazion de Roe dai Stans e ae lotizazion dal teren al fin di vendilu in concession ai artesans e ai buteghîrs. Denant dal puint jevadôr e fo tirade sù la loze publiche, e dongje la Puarte des Oris al fo scjavât il poç comun. Al dì di vuê il vecjo insediament urban al è pôc cognossibil par colpe dai cambiaments avignûts intal XVI secul; cundut a chel i puartins che a si cjatin a Nord de atuâle Place Cjistiel a testemonein la vocazion comerciâl di cheste prime celule urbane.
Scjavaçant la place e indreçantsi viers l’atuâl domo a si cjate propit la Roe che a bordizave la prime cengle, e che a si cjatà intal mieç de citât di Voleson; cuant che i Siôrs dal paîs atôr dal 1350 a deciderin di slargjâ la cengle de vile cuntun secont e plui grant ambit urban. Il disen de "lotizazion" dal cussì clamât "borc didentri" al è un dai plui luminôs esemplis di urbanistiche de Ete di Mieç intal Friûl Ocidentâl. Une strade a leave il puint jevadôr dal cjistiel ae antiche puarte pueste su la Roe dai Stans, e il "Porton" che al dave su la vaste place comerciâl e puarticade pueste viers Darzin. Chei atris vicui a son invezit perpendicolârs a chest as stradâl di composizion urbanistiche. Sul flanc a Nord e jere stade costruide la piçule glesie di San Jacum, vuê discuvierte dentri di une cjase cun puartic, invezit difûr dal "Porton" al jere za cognossibil il borc nassût atôr de glesie di Sant Zuan e Sante Marie, vâl a dî l’origjinâl glesie di Voleson. Par cuasi cent agns l’organizazion urbanistiche de citât e no subì grancj cambiaments, dome daspò la cjadude dal patriarcât, la vignude di Vignesie e la riprese dai trafics comerciâi su l’as Puart-Vençon a si viodè la necessitât di progjetâ un ulteriôr ampliament de citât.
Chest gnûf intervent urban al fò opare di Giacomo Giorgio di Voleson. Intes intenzions dal feudatari al no jere dome il desideri di dâ ae citât une gnove espanzion urbane (tierce e ultime), ma ancje la volontât di ristruturâ lis zonis citadinis za edificadis su le fonde di une radicâl riorganizazion dai servizis e dai lûcs sacris. Giacomo Giorgio al fò il principâl responsabil de costruzion dal domo (1449) al centri dal borc interni, di front dal "porton" cumò no plui esistent. La gnove glesie e esautorà ben doi edificis sacris, la gleseute di San Jacun e fò bandonade in favôr di un omonim altâr intal domo, invezit la vecje glesie di Sant Zuan e Sante Marie e pierdè il sô caratar di parochiâl. La place dal borc interni e assumè une gnove dignitât formâl graciis al sevêr frontâl de glesie dal "Cuarp di Crist", invezit il gnûf e bielissim cjampanili al deventave il puint simbolic dal grant progjet urbanistic di Giacomo Giorgio. La place de contrade e il cjistiel a restarin il lûc dal podê civîl, abitance dal tribunâl, de cancelerie e lûc des publichis adunancis. Il tierç e plui recent setôr urban al assumè une conotazion plui popolâr. In cheste zone e fò tornade a costruî la glesie dai Santissims Pieri e Pauli, une vore cjare ae popolazion resident e in bande di cheste al fò riorganizât il vecjo ospedâl che lis cjartis a documentin in ativitât almancul dal 1355.
Giacomo Giorgio di Voleson al puartà a compiment i siei progjets dome intal 1495 procedint ae ricostruzion de glesie di Sante Marie che cun l’ampliament urban a si jere vignude a cjatâ dentri dai mûrs citadins. La glesie di fat subordinade al domo, e fò concedude ai Servidôrs di Marie che a impegnarin il nobil di Voleson inte costruzion di un munistîr a servizi de citât, sigurant, in cambi, il lôr impegn tal puartâ confuart e jutori ae popolazion resident plui umile e bisugnose. Cun cheste ultime opare Voleson al otignè une sô identitât incentrade sul antîc cjistiel, su lis trê zonis urbanis e sui doi borcs extra-urbans dal cinccentescs: chel di Darzin e il Borc des Ocjis. Dome la rivolte di joibe grasse dal 1511 a destabilizà il progjet cuatricentesc. I rivoltôs e i popolans a incendiarin il cjistiel abandonât dai nobii. I agns a vignî a servirin ae famee dai Volesons par formulâ un progjet plui ampli di ristruturazion de lôr residence che a cancelà lis valencis carateristichis dal vecjo manieri inzentilint lis sôs formis e metintlu in relazion ae gnove place realizade viers il 1538. La citât di Voleson di chê volte a no je cambiade une vore; il timp al a fat sparî la vecje glesie di Sante Marie, lis puartis urbanis de seconde e tirce cengle e la loze publiche di front dal cjistiel. Ator la fin dal 1800 ancje culì come lis altris citâts furlanis a forin butâts jù cuasi completamentri i mûrs di cengle de citât. Cun dut achel l’atmosfere medievâl de piçule citadine feudâl e je ancjemò perfetamentri percepibil tes architeturis da lis trê placis e des tantis piçulis stradis medievâls.

Moreno Bacichet   (da «Valvasone, Guida all'incontro»)