Il Cjistiel

 

Il complès e massiç edifici che al domine cu la sô maestositât Place dal Cjistiel, probabilmentri al rapresente l’element plui carateristic dal paesaç citadin di Voleson; il cjistiel al dì di vuê al si presente come la some di une schirie, une vore lungje, di intervents architetonics cence soluzion di continuitât, su lis fondis di une prime tor di epoche tarde antighe, cun funzions difensivis e di vuaite. In mancjance di studiis direts su la costruzion atuâl, a si puedin individuâ diviersis fasis e modalitâts edilizis: ancje ai voi di un no adestrât ae osservazion, a no puedin scjampâ i particolârs di un prin Tresint, metûts dongje a atris dal Cuatricent, dal Cincent, dal Seiscent e dal Votcent.
La plante dal cjistiel a si presente come une sorte di anel che i difarents intervents intal cors dai secui a àn interot (un câs simil al è chêl di Spilimberc) scancelant cuasi ducj i particolârs che la tradizion a vûl che a sedin tipics di chestis struturis: tors, mierladuris, puints jevadôrs. La jentrade, passât la fuesse, cumò sute ma un timp plene di aghe, e je caraterizade di une puart uniche, vierte inta ce che e restave di une vecje tor che e je stade cjapade dentri tai mûrs daspò jessi stade sbassade in altece. La jentrade e je protezude di une sorte di antipuarte, dulà che, intal flanc, de bande de place e je stade cjapade dentri dal mûr une gruesse bale di catapulte in piere.
La cort cun tal mieç un poç di forme taronde e presinte un perimetri iregolâr, e e je dute circondade di mûrs une vore alts che i dan la forme di un prisme slargjât.
In bande al puarton di jentrade a si pues viodi ce che al reste di une viele tor, un timp alte 18 metris e demolide intal 1884 parcè che divignude piricolose par la sigurece dai citadins, a cause dai dams dovûts al passâ dal timp e ai taramots. Ce che al reste al nus fâs viodi in maniere clare la sô grande struture che e presente muraduris dal spessôr di plui di un metri, di otime fature e dai materiâi cuets cun cure.
A çampe cui che al jentre inte cort al pues viodi un piçul puarti cui arcs sbassâts, opare de fin dal 1700 prins dal 1800, che al veve di servî a nobilitâ la jentrade d’onôr dal cjistiel, destinade al aces ai apartaments di rapresentance. Daspò zirât il cjanton si puedin viodi i caratars di une operazion de mitât dal 1500 leâts ae volontât dai siors dal periodo di modernizâ il cjistiel. E je propit cheste ale dal cjistiel ancje se inseride intun contest une vore verneglât, a present^a i caratars di majôr organicitât e a rimande a un progjet unitari che a cjapave dentri dute la strutture des fondis al tet. Considerevul l’intervent di lavorazin de piere a definizion des antis e dal soiâr disore dal porton di jentrade, des vierziduris dai barcons, dal pujûl inzentilît cun des colonutis a forme di baston dal comant e ingraciât cu la presine di doi picçui leons pognets sui cjantons: un rinassiment di savôr lagunâr. Dentri dal cjistiel al plan tiere, un salon decorât cun pituris dal tart 500 di mans anonimis; al inizi dal 800 al è stât creât un piçul teatri (in epoche recent privât dal scenari) cuntune file di palcuts in len dulà che chei tal mieç a jerin riservâts ai components de famee. Al prin plan une grande sale cul sofit a travaduris scuviertis inframiezadis di pituris. In altris stanziis di cheste e di chê atre ale dal cjistiel une schirie di locâi piturâts cun cîi di otim nivel (cineserîs e sogjets esotics) dai prins dal ‘800, leâts probabilmentri aes spedizions militârs napoleonichis in Egjit. Inte ale centrâl a si puedin ancjemò viodi: la cusine cul sô grant fogolâr che al clama ae memorie lis pagjinis dal Nievo; la capele di famee dulà che l’altâr al è decorât cui stucs dal ‘600 di Bernardino Barelio, aromai discomparide invezit la pale piturade di Giulio Quaglio rapresentant la Imacolade Concezion.

da «Valvasone, Guida all'incontro»

I Afrescs dal piçul teatri

 

Da la ristruturazion dal cjistiel a son vignûdis fûr des gnovis e interessantis pituris a fresc. Paolo Casadio studiôs e critic di art al comente cussì in "Interni friulani dei secoli XIV e XV : le decorazioni dei muri", i rinveniments in zone teatrin.
«I fruçons di pituris cjatadis a Voleson a si disvilupin su la part centrâl de parêt çampe e su un toc de parêt dal porticât (murât ai prins dal 500). Pûr no jessint clâr il rapuart jenfri i sogjets rapresentâts, al è une vore probabil che il scheme des decorazions al fos "viert" ancje se a difarence des pituris a fresc Perugini, a nol è plui presint il paesaç che al unifiche i difarents episodis. I sogjets a jerin metûts dentri in ricuadris diponûts ai lats di une composizion centrâl dulà che e jere disegnât un grant bâr vegjetâl di dulà che des fueis a pendevin jù dai globis (dome dôs figuris a si son conservadis, doi fruts che a zuin e doi omps fats che a tabarin jenfri di lôr). Intal episodi rapresentât a diestre dal morâr e je piturade une scene di sogjet cortês: une regjine, compagnade di dôs elegantis fantatis che a sunin la viele e l’arganet puartatil, a done a un zovin cavalîr vistît cu la corace, un parecjâf e une corone. Une rapresentazion che a incjargne i ideâi de virtût vueriere e de culture aristocratiche de Ete di Mieç: il vueriêr al a la cjalade dure e zintîle, invezit la dame e à la cjalade rapide e i lineaments delicâts. Chestis pituris a fresc pûr presentant i caratars tipics des pituris locâls dal ‘300, a mostrin za lis tocjadis carateristichis de piture venete – fra Verone e Vignesie - dai prins dal ‘400, velu duncje che chestis oparis a puedin verosimilmentri datâsi intai prins vincj o trente agns dal XV secul.»