Comune di Valvasone

A fo unanimementri decidude la costruzion di cheste glesie intune assemblee che e jodeve la presince dai nobii e dai abitants di Voleson, riunide te matine dal 21 di Lui dal 1449 inte piçule glesie locâl di Sant Jacum.
Pe erezion del gnûf templi, che al veve di sostituî in dutis lis sôs prerogativis la vecje parochiâl (da la cuale o fevelarin fra un pôc) ritenude masse strete e decentrade e che si volè intitulâ al SS. Cuarp di Crist probabilmentri a eterni ricuart dal sostignût miracul dal cuâl a si conserve sul puest la relicuie miracolose de Sacre Tavaie, i Volesons a si impegnavin a cedi une areee comprindude jenfri la seconde cengle murarie, in chê volte ocupade da cjasis e orts di proprietât comitâl.
Pecjât che a no si cognossin il non dal eventuâl redatôr dal progjet e i ritmis secont i cuâi a chest a fo dade atuazion ancje se par pì di une razon podin crodi che la costruzion e procedè, par la presince in paîs di chê altre parochiâl, in maniere pluitost lente. Ipotesi che a cjatarès conferme tal fat che dome - simpri che la date e sedi juste - tal 1484 a si podè procedi ae consacrazion dal sacri edifici.
Si tratave - e ancje cumò par fortune si trate, dal moment che i omps e i timps a no àn scancelât lis struturis architettonichis jessudis des mans di chescj mestris muradôrs dal Cuatricent - di un ampli van a plante retangulâr, a cjavai scuierts, che a finissin viers soreli jevât - come che voleve la tradizion - cuntun presbiteri flancât da altris dôs capelis dulà che chê a cjampe e à ancje funzion di basament par il sorastant cjampanili.
Une tipologje cheste di fat origjinâl, ispirade, ancje tes liniis di tart gotic, a realizzazions presintis in zone: cence lâ masse lontan, chê plui similâr e pâr jessi costituide de parochiâl di Manià consacrade intal 1488.
Cuasi inutil zontâ che la funzion consacratorie dal 1484 e sarà da considerâ dome une tape inte lungje vicende architetoniche di cheste glesie, chê ven a stâi che veve jodi rivâts a conclusion i lavôrs di muradure (probabilmentri da completâ al restave ancjemò il cjampanili) e un prin lot dai intervents dal furniment par lis trê capelis recuardadis: altaris cun relativis palis, bancjadis corâls par il presbiteri. Operazion cheste ultime cence dubi puartade indenant - ancje se magari cussì no a no è documentabil come che si volares par lis lacunis dai socors archivistics - dilunc dai prins desenis dal Cinccent. Testemoneancis di cheste lente opare di abeliment, motivade da esigjencis de liturgje da une bande e de afermazion de proprie "imagjin" da part dai conts juspatrons de glesie da chê altre, a saran da considerâ la costruzion dal orghin partide intal 1532; l'erezion dai altârs dal Cuarp di Crist (cun tabernacul pe custodie, tra l'altri, de Eucarestie), di Sant Nicolò da Bari, da la Sante Crôs e dal Presepi (o de Madone metût sot la cjantorie dal orghin a indi completin fin al paviment la machine lignee intagliade e dorate), ducj pronts pe rituâl consacrazion fate intal 1550; la furnidure da part dal pitôr Pomponio Amalteo di une pale par il nomenât altâr dal Presepi, come da contrat firmât tal 1551 contestualmentri ae comesse de decorazion dal prospet de cjantorie e di altre tele par l'altâr de Sante Crôs e di un Crucifis di len, oparis dutis dôs metodi in opare fra il 1556 e il 1557.
Par fâ in mût che il turist che tal 1573, al seguit dal vescul di Cuncurdie Pietro Querini in visite pastorâl ae glesie (ma ancje chel che varès compagnât Cesare de Nores, in paîs par stesse funzion, tal 1584), ves ponût ai pîts in chest templi al varès podût jodi a cjampe, subit dome passade la puarte grande, l'altâr di Sant Nicolò; te capele a cjampe dal presbiteri l'altâr dai Ss. Jacum e Cristoforo (di front dal cuâl a pendolavin lis cuardis che a azionin lis cjampanis de sorastant tor); intor dal set divisori in muradure l'altâr dal Cuarp di Crist cul tabernacul; tal presbiteri, iluminât da dôs monofore, l'altâr maiôr e cu la pale rafigurant il "Salvatôr" probabilmentri ostendente lis piaghis de passion; te somitât dal arc trionfâl, poiât su traf, il grant Crucifis di len dal Amalteo; aduès al altri set divisori, viers diestre, il piçul altâr da la Sante Crôs; inte capele vissine al altâr di Sante Catine di Alessandrie; sot la cjantorie l'altâr dal Presepi.
Vie par la prime desene del Sîscent, par dâ cors a une sistemazion dal interni de glesie par rispuindi a gnovis esigjencis de cuintririforme, a vignevin ristruturât  i altârs di Sant Nicolò e de Crôs (chest ultin puartât te navade cuntune gnove pale piturade da Anzolo da Puart di Gruâr); tornade a fâ cuviertidure del batisteri par opare di Pietro Tellino e, forsit simpri par opare dal stes, ancje gnovis bancjadis dal presbiteri puartadis daûr l'altâr maiôr a sô volte tornât a costruî "a la romane".
Simpri come risultât de culture cuintririformiste, aromai però cence ansiis cuintriversiastichis o di didatiche religjose imediadis, fra la seconde metâ dal Sîs e la prime desene dal Sietcent a si regjistre une gnove modifiche dal furniment fis (che a si compagne uvuâl operazion relativamentri a chel mobil) tal interni de glesie: il marmul al sostituìs il len intaiât, il sflandôr des indoraduris al lasse il puest ai colôrs des pieris, lis dimensions a si slungjin ae ricercje dal  efiet senografic.
A si scumence cussì cun il meti man, te seconde metât dal Sîscent, ae complete rinovazion dal altâr maiôr che al piert la sô antighe pale cul "Salvadôr" e a si viôt esaltât il protagonisim dal tabernacul ancje in rapuart al incressi dal cult viers la miracolose relicuie de Sacre Tavaie. E po dopo, a cjaval fra i doi secui e je la volte dai vissins di Sant Jacum e di Sante Catine d'Alessandrie sul cuâl ultin a si volè colocâ une pale di Giulio Quaglio. Tal 1705, infin, a completament di dute l'operazion di "cosmesi" a si procêt a tornâ a fabricâ in marmul e piere l'altâr de Sante Crôs. Di minôr impuartance i intervents dal Sietcent fra i cuâi a laran sottolineâts la erezion de Via Crucis tal 1754 e la rinovazion de pale dal altâr di Sant Nicolò par opare di Matteo Luigi Canonici tal 1791. Intal cors dal Votcent i unics lavôrs di un ciert significât a somein jessi chei par tornâ a fâ la pavimentazion in piere de navade fidâts tal 1870 a Luigi de Mori da Serravalle e finîts tal 1871, cu la conseguint scancelade, infûr che dôs ecezions, di dutis lis lastris tombalis, e la furnidure tal 1872 di une balustrade in ghise par il presbiteri, cun la metude in vore da la cuale probabilmentri a si demolirin i doi altârs ancjemò poiâts ai lats dal arc trionfâl. Ma la opare destinade a lassâ une olme profonde te glesie e vigneve scumençade intal 1889 e puartade ae fin dilunc la prime desene dal secul atuâl. Si tratave da la ristruturazion radicâl de façade, dal tornâ a fâ ducj i barcons in formis difarentis da chê ereditade dal secul passât, dal tornâ a piturâ suntune gnove stabilidure, che probabilmentri e scancelà dutis lis traciis di afrescs precedents, dal interni ispirât a un revival neogotic che al invistive ancje il cuintritet, la bussule, la cuierzidure de font batesimâl e il pulpit-bussule da la puarte laterâl. La complesse e discutibil operazion e fo vuidade seguint i disens di Luigi Polo Lenardon di San Vît dal Tiliment e e costà la spese di 26473 liris e 41 centesims. Impegnât te conservazion plui che tal rignovament al risulte il corint secul, dopo il scjampât pericul dal 1907 cuant che Domenico Rupolo al presentà un progjet par une complete revision de aree presbiteriâl. Per il moîf di jessi esorbitants da la normâl gjestion ordinari, si podaran visâsi: l'elettrificazion des cjampanis dal 1954, la proviste di gnûfs bancs dissegnâts dal udinês Giacomo della Mea inaugurâts tal 1961; la colocazion intal 1964 di un gnûf orghin tal retri dal côr par opare de cjase organarie codroipês di Francesco Zanin di Gustavo Zanin cun il slontanament des bancatis corâls dal Sietecent confinadis, fin a vuê, tai deposits de cjase canoniche; il restaur intal 1974 de part foniche par opare di Alfredo Picinelli di Padue e de part artistiche par firme di Marchetot dal orghin dal Cincent permetint cussì il tornâ a meti in opare del strument tal contest di un progjet rivalutatîf  ancjemò in dì di vuê perseguît; il consolidament e la resintissime piturade de façade da la gelsie ofindude dai sismis dal 1976.

Fabio Metz(da «Valvasone, Guida all'incontro»)